Fasnacht 2016

Im Summer hän mir welle mol spontaan in d'Ferie fliege.
Mit Billig-Eel - so hän mir dänggt - kasch s'Billig-Fliege iebe.
Fir d'Bildigsrais hän mir dernoo dr noochi Oschte gwäält,
Nur an Iberbligg hett's uns denn bald scho gfäält:

Dr Syyrer hett drum Strytt mit dääne vom IS, Und die hän
mit Rebälle und Iraner Stress.
Will die Schiitte kepfe sin d'Ayatollas muff uff d'Saudis.
Uss Sicht vo däne sind derfiir d'Iraker Raudis.

D'Putin-Bomber hebe fir en Assad ab, D'Tiirke gseen's nit gäärn
- schiesse dr Voogel ab.
Das steert jetzt wider d'Kurde, die sin am aigne Staat grad draa,
Und alli zämme flueche iiber d'USA.

Am Änd isch d'Rais seer leerryych gsy, das kaa me nit vernaine:
Bisch Find vom Find, findsch Frind bim Find, Au wenn d'Frind Find dien maine.
Uns Schwyzer isch's egaal, will mir sind nit vo dääre Wält.
Verkaufe Waffe ganz neutral und hiete dääne iires Gäld.



Hou je minee!
D'Schnitzelbängg hän friener iber Ziircher glacht.
Hitt wäärde Väärs ibers Baaselbiet gmacht.

Im Baaselbiet kasch ginschtig woone!
CHOR: Will d'Stadt subventioniert's mit achzig Millione.

S'Baaselbiet isch immer scho gaschtfrindlig gsyy
CHOR: Welcome Refugee uff dr Chemie-Deponie.

Baasel-Land, s'isch e Schand und im Grund allerhand fir dä Stand.
CHOR: Dr Unverstand gwinnt langsam Oberhand.

D'Baaselbieter wänn e Uni-Institut.
Dasch wichtig, will: «Bildung tut gut!»

S'isch nit nur schlimm, sin si dr letschti Pfoschte.
Derfiir kunn kei Chinees verbyy zum si go poschte.

Im Baaselbiet wird nei weniger gstoole.
Will d'Ybrächer wisse - do git's nyt mee z'hoole!



Mir singe jetzt e Lied fir d'Schwoobe.
Fir uns sind d’Schwoobe d’Nummer ains.
Mir wänn si fir iir Motto loobe: Lieber vyyl Brobleem als kains.

Die Dytsche blyybe rueig hän Willkommenskultuur,
die kennte meereri Millione Flychtling haa.
Wenn d’Merkel dääne sait: «Wiör schaffn das schoon»,
Denn glaube die bis zum Schluss do draa.

Dr Gliimaamotoor vo VW hett e Fäälfungtioon,
Doch dr Umwältschutz hett z'Dytschland Traditioon.
In Berlin mache si’s voor: Si investiere e Billioon
in e Fluughaafe – ooni Läärm und Emissioon.

Dert fliegt bis hit kai ainzigs Flugi. Das isch dr Merkel doch egaal.
Die gwagglet zwaimool mit em Fuudi – und gwinnt die neggschti Waal.

D'Schwyz hett Traditioon als e Flüchtlingsraisezyyl,
Drum waiss e jeedi Gmaind, wie d'Flychtling kasch umgoo.
Doch sin mir jezt belaidigt vo Chur uff Mimliswil,
will alli Flychtling - lieber wänn uff Dytschland goo.

Bi uns, do loot sich kuum ain bligge! Schwyyz Tourismus schloot Alaarm.
D'IKEA baut uns Billighitte. Die gän herrlig waarm.

Wieso hän die nit zue uns welle? Mir hän doch Bäärge, Schoggi, Schnee.
Bi uns kasch uff dr Rächtsstaat zelle: Wär ussgschafft wird, sait d'SVP.

Schlyffstai

«Jä nai», het d Mamme Köppel gsait, wo sii erfaare het,
Ass ihre Sohn, dr Roger, Naazi-Lyt aahimmleret.
«Jetz isch es z spoot», het sii sinniert und sich an d Stirne glopft.
«Hät ych dä nur vor fuffzig Joor in d Babyklappe gstopft.»


Das Hindli vo dr Meyere isch glai und digg und fett
Und haisse duet s Prinz Charles, will s schampaar groossi Oore het.
Jetzt het sy sich zem Hindli aane no-n e Scheefli kaufft
Und het das arme Unschuldslamm – Blatter Seppli taufft.


Ych gang alls zu dr Julika und wird vo ihre quäält,
Wird gschlaage, gfesslet, aabegmacht– ych ha das sälber gwäält.
Das isch fir mii als Mänätscher dr ideali Drill,
Wenn ych moll bi dr Frau Martullo-Blocher schaffe will.


Wie gfalle Ihne d Stroossekraisel doo in unsrer Stadt?
Die Schigganiererei, die findet d SVP nit glatt:
Muesch brämse, waarte, ummeluege, blochere kasch nit.
Und s Schlimmschte: S het im Kraisel immer dää vo linggs Voortritt!

Schnabelwetzer


Alls redt vo Flichtling und maint die vo wyt,
nur glaub i es kunnt no en anderi Zyt.
Was mainsch, wär denn alles uf Baasel hi drängt,
wenn dääne in Lieschtel der Bulver nimm längt.

Schoofsuri

D'Fasnacht isch zwar scho verby.
I glaub i bi chli hindedry.
Doch bini nid dr ainzig dängg,
wo Freud het a de Schnitzelbängg,
wo cha schmunzle und lut lache
wäg de Bänggler ihre Sache.
Wenns ech langwylt sagets! Vellicht
heer i denn uff und mach au dicht.

Feschtbrueder 29.02. 2016


"Jaaa … irgendwie sicher … de Böle la laufe …
Jaa klaar … ääh natürli … vo dem chasch der nüüt chaufe …
Jaaa sicher … sehr wichtig…
Jaa schoo, säb isch richtig …" – – –
Das git e guete Bundesroot,
wenn dr Schneider-Ammann goht!

Doch bis dä Schneider-Ammann goht,
isch s für dr Fischer au scho z spoot.


Syt kurzem herrscht dr Ueli über d Bundesfinanze,
jetz fliege dängg d Bundesfinanze uff e Ranze,
denn esoo, wie mir dä kenne,
git s ab sofort e Renne
mit em Baselbiet und sym Gäld
um s beschte Defizit vo dr Wält.

Dr Toni Lauber gsehsch jetz laufe,
in Lieschtel s SURPRISE go verchaufe.


E Gipfel z Paris seit, ass d Luft uf dr Ärde
nümm mee as zwei Celsius wärmer darf wärde,
au d Schwyz duet signiere,
si well Warmluft reduziere,
dr Basler Bydraag, liebi Fründ:
D Baz hett numme no zwei Bünd.

Bi sällem Journalischte-Stil
isch au e halbe Bund no z vyl.


Dr Ysatzbyfähl luttet: schussdichti Weschte,
Sturmhuube, Zahnschutz, dr Schlagstogg am beschte,
göhnd au go d Pistole
und s Dräänegas go hole…
FC Züri? Frogt ein blaich?
Nei: Fraueschutz am Morgestraich!

Bi mynere wurd das nüt nütze,
muesch ehnder mii vor iire schütze!


Es seit dr alt Leu zue sym Sohn: «Lueg dört ääne
darfsch gar nie go spiile, dört wohne d Hyäne,
fallsch dääne in d Klaue,
kasch lang go miaue,
s sinn Schmarotzer, s isch e Schand …»
«Papi, isch dört Baselland?»

Hesch s as Hyäne nit so schwär:
Bisch 80-fache Millionär !

Schunggebegräbnis

Ich habe Freude an den Schnitzelbänken,
kann auch darüber lachen und schmunzeln.
Stoff genug gibt es ja eigentlich nicht nur an der Fasnacht.

Auf jeden Fall: ein grosses DANKE

Danke Dir Lilith für deine Rückmeldung! Ich freue mich sehr darüber.

Zem Gotthardtunnel hört me täglig d Doris Leuthard huuche:
Mir baue jetz e zweiti Röhre zum si denn nid bruuche!
Mi ka, was ych mues höre vo so Röhre, nit betöre
Und bsunders störe duet mi däre Leuthard ihri Röhre.


S isch s Rösli in de Wanderschueh so schregglig gärn mit Andere
Bi Räge und bi Sunneschyn im Alperuum go wandere.
Das Rösli git s jetz nimme, denn äs het fir ewig Rueh.
Do kasch s bim letschte Selfie gseh mit ere Muetterkueh!


Dr Crédit Suisse vo Ziri het e neje Chef biko
Dä basst in s gwohnti Bild vom Schwyzer Bängger nit eso.
Doch grad fir uns in Basel isch dä neji Ma e Hit:
Me gseht bim erschte Augeschyn: E Zircher isch das nit!


D Frau Hueber het s nej Trämli, wo uf Weil fahrt, miesse nä;
S het drum im Märtkauf dört zem halbe Prys zwölf Aier gä!
Und bis si zrugg no all däm Stau am Bläsiring ka lande,
Sin statt de alte Aier scho zwölf Bybbeli vorhande.


Si hän dr Roger Köppel no dr Wahl in s Bundeshuus
Im Interview befroggt, ob s ihm nit vor sich sälber gruus.
Do sait dä, s Gruuse kunnt mir als, doch numme ganz vo färn;
Wenn ych d Martullo-Blocher gseh, han ych mi wiider gärn!

Schwoobekäfer


Y haan e Bünder gfrogt: Jä hänn dir denn e Knall?
Isch das jetz wirgglig eures beschte Ross im Stall?
Do säit dä: Näi, es isch meh praktischer Natuur.
Wenn sy in Bärn isch, isch sy wyt ewägg vo Chur.


Uf der Autobahn vor Bärn kunnt d Frau Martullo
wäge Raase in e Bolizei-Kontrullo.
S miech äifach Spass, säit sii däm Schugger unverhohle,
wenn sii der äige Vater rächts könn überhoole.


D Frau Köchli lauft der Heubärg ab mit ihrem Bello.
Em Hund däm stinkts e bitz. Er schnupperet amme Vello.
Denn findet är e Pfoschte, g’äignet für sy Zwägg.
Doch won er s Bäi denn lüpft, do isch der Pfoschte wägg.

Und während er als no stoht und stuunt ab däm Gebaare,
wird er vommene Liiferwaagen überfahre.

Singvogel