Fasnacht 2016

Bevoor sich d FIFA no ganz ent-Blatteret
hett sich dr Blatter scho wieder e Job ergatteret
drum wäärde denn d Kuehkämpf vom Wallis oobe
uff e andery Kuehwaid in Kuwait verschoobe


E Bligg uff my R OLEX zaigt, y muess myny KELLOG'S lo schtoo
und sofort mit em PORSCHE in d NOVARTIS goo
dört gitt s zeerscht e NESPRESSO – nur zur Orientieryg
das isch jetz halt so e Väärs gsi mit Produggteplatzieryg

Fäärimaa


Es maint der Christoph Mörgeli das syg jetzt z vyl.
Me löscht uf facebook ohni z frooge sy Profil.
Das goht jo nid Herr Mörgeli, well das jo so isch:
Me ka doch numme lösche was au wirgglig doo isch!


D Frau Spiess - Strich Hegglin, duet au gärn e Bierli dringge.
Syt e paar Monet duet das ihre aber stingge.
Zem Glügg ka si do jeedi anderi Marke ha,
denn si dringgt bombesicher nie me Hürlimaa.


Der Keenig Josef mecht e bitzli gsellig sy
Am liebschte mit em Keenig Michel – Platini.
Und au der Kaiser Franz isch zhaa für sottig Sache
Im Knascht bim Hoeness denn e tolle Schieber zmache.

Gasladärne


Wäg ere Brugg hänn d Urner sich mit em Teufel verschwoore
drum het vor 800 Joor e Geiss sy Seel verloore
jetz git me däm Gotthard scho widder d Spoore
i glaub die Geiss isch als Leuthardt wiidergeboore


D Schwoobe dien an d Flüchtling dängge,
in däm si jedem e n IKEA-Hysli schängge.
Zem sälber baue, do waiss doch jeede Goof,
dasch nit human, das isch e Stroof !


Ooni Quote, kai Sponsor und kai Reklaame
drum bruchts im Schwyzer Schutte Sofortmassnaame
um für Spannig z sorge, vo vorne bis nach hinde
mien jetz d Basler Spiiler ai Bai uffebinde

Glettyse


D' Nationalrootswaale, sinn wie e Märli gsi.
Us em Oriänt kunnt d'Sibel, die grieni Wunderfee.
vo hinter siebe Bärge, kunnt d'Matullo" mit vill Zack
Und d'Zircher geen uf s'Ganzi
Sie mache "Köppel aus dem Sack"


D’Widmer-Schlumpf hett kindet, und SVP marschiert,
sie sueche ein mit Kante, und nid z’fescht profiliert,
e uffrächt rächte Schwyzer wo ka mit Gäld umgoo,
de Parmelin kunnt yne,
Ych hätt dr Blatter Seppi gno


Ha-ha, Bärge, luschtig, Jodle, Milch und Kueh
Schoggimöggli gluschtig, und Cervelat drzue
Ländler, Vierrad-Aatrib, e Schwyzerkrütz im Schnee
So deent dr näggschti Wahlsong
vo dere glatten SVP

Hansli Bargäld

Mi Frau die spart und duet no mee spaare,
si kauft drum nur no die billigschte Waare.
Falle d Priise no wyter, duet si mir oohni z geniere,
dr Salat mit Essig und Haizöl serviere!


Sii- ych find das garnid glatt,
das Diktatoregschnatter in däm Äxtrablatt.
Me sott alli Diktatore – ych wurd derfir sorge,
uff dr dunggle Syte vom Mond entsorge!


Dr Ueli Murer duet em Parmelää,
non e ghaimi Waffen iibergää.
Er zaigt em wieme dr Find verschreggt,
wemme d Soldate - in e Wawrinka-Hoose steggt!


Wenn e Dichter dichtet - gits e Gedicht,
wenn e Sanitär dichtet - sin d Rööre dicht,
wemme d Stadt verdichtet - verliert si s Gsicht
wemme mii dät verdichte - hätt y weniger Gwicht!

Hanslimaa


Mir Baselbieter bruuche euchi soudüüri Uni nid.
Mir häi z Sissech d Buureschuel, wo s für euse Noochwuchs git.
Ohni die Gstudierte wärde mir vill günschtiger fahre.
Wenn s denn käini Dökter me git, chöi mr au d Spitääler spaare.


Liebi Basler, machet doch käi Gschyss wäge achzig Millione!
Schliesslig syt diir sälber tschuld, dir wäit jo z Basel wohne!
Und überhaupt, dr gröschti Däil het dr Heiri finanziert.
Ich ha nämlich letschti Wuche drei Mool bi euch parkiert.


Y will mit mym Hof an d Böörse, y will au emol abkassiere.
Bevor y aber starte chaa, muess y zerscht no inveschtiere.
Y ha wäg dr Frauequoote e neue Muuni kauft.
Dä han y denn Magdalena Martullo Blocher dauft.


Sit letscht Johr het Basel e Köönig. Basel isch jetz e Monarchie.
Dr Köönig häisst Marco Streller, nid öppe Morin Guy.
Är isch treu, het vill Charakter, isch dr Traum vo de Schwiigermieter.
Aber s bescht am Basler Köönig isch: Är isch e Baselbieter.


Y sitz im Summer uff mym Traktor und güllere myni Matte.
Y gniess dr wunderbaari Gschmack, y gniess d Sunne, gniess dr Schatte.
Plötzlich stinkt s. Dr Gschtank isch heftig, drum styyg y ab mim Chaare.
Do gsehn y, aha, dört isch grad äin mit sym VW duuregfahre.

Heiri

Feschtbrueder, es wäre an der Zeit dein Avatar zu ändern. Osterhasen sind angesagt

Weil´s doch hier um Fasching und Lustigsein geht, hätt ich noch ein - wie ich meine - passendes Gedichtchen gefunden :

Der Humor

Es zog durch die Straßen der lust'ge Humor.
Ihm folgte laut lachend ein Menschenchor.
Sie freuten der Späße sich, die er trieb,
Und wie er auf die Narren hieb.

Nun trat in sein Haus er, in sein Gemach,
Und ein paar Menschen schlichen ihm nach.
Ist er draußen so fröhlich – fiel ihnen ein –,
Wie lustig muß er erst zu Hause sein!

Doch es machte starr sie, was sie geschaut:
Der Humor saß im Winkel und weinte laut.

Albert Roderich
(1846 - 1938), deutscher Dichter und Aphoristiker

Passt schon!

Wer de FCB es bitzeli duet känne,
weiss dass die jetz neu em Bölle noche ränne.
Und wenn en Spiler e chli zwenig umerännt,
wird er vom Fischer noch em Spil als Böög verbrännt.


Me isst e Beggeschmutz, anstell vom Näägerkuss
und wenn d e Moorekopf verlangsch, kriegsch ains an d Nuss.
Politisch unkorräggt isch alles und scho bald,
saisch uss luuter Angscht em Schwarzwald nur no Wald.


Der Petrus sait: „loos Sepp, du bisch e bitz e Lute
und erscht no gspeert, drumm darfsch du nit im Himmel schute.
Faar zer Höll, do Oobe hesch du di verirrt,
wirsch es gsee, deert unde lauft s fir di wie gschmiirt“.


„In Sache Burka draage“, maint der Brunner Toni,
„ganz eerlig, ich gsee d Fraue aifach lieber ooni!
Doch wenn s denn si muess, mache mir kai grosses Gschiss
und erlaube die uss Stoff mit Edelwiss“.


„What are the seven thinking steps“, froggt d Frau Martullo
und stoot am Reednerpult grad wie ne wilde Bullo.
So wie bim Stierkampf kunnt bi iire jeede draa,
nur dass e jeede Stier vyyl besser Änglisch kaa.


Ändlig git s in Basel wiider e Event.
Fir d Miss Schweiz Waal kemme Promis wo me kennt.

D Beatrice Egli schaidet uss, es isch banal,
doch dangg em Utter gwinnt si bi Miss Simmental.

D Eva Herzog kunnt und findet s gar nit fair,
will si gwinnt d Kategorie Miss Frigidaire.

D Leutenegger Oberholzer schiggt me fuurt,
derfiir gwinnt sii der Wettbewäärb zer Miss Gebuurt.

Kai Chance het d Anita Fetz, das macht sii ranzig.
D Maas wääre ideal, 90 – 100 – 120!

S Tamara schitteret im Interview fatal,
si maint der Genitiv sig s glyych wie genital.

Als Delegierti vo de Schwoobe kunnt d Frau Merkel,
si gwinnt der OLMA Spezialbryys „Hübsches Ferkel“.

Au d Helen Fischer isch derbi, s dien alli loobe,
doch die vom Baselbiet wei eifach keiner Schwoobe!

Au Tina Turner kunnt dää unverwieschtlig Fääger,
doch die vom Baselbiet die wei au keiner – Schwaarze.

D Widmer Schlumpf dritt gaar nit aa, so kaa me lääse,
es isch will sii kai Paarkblatz kriegt fir iire Bääse.

Als Iiberraschig dritt d Martullo-Blocher aa,
doch d Schwäärgwichtsboxer sinn erscht näggschti Wuche draa.


Penetrante

Wääge Würscht kaa me lut WHO
s Bstegg abgää - so noo dis noo.
Gang froog emool di Metzger, denn luegt dä d Würscht im Gschtell aa
und sait: „Am deedligschte isch dängg, do dä MORDadella.“


D Flichtlingsmueter Simonetta
bietet jedem wo kunnt e Bett aa.
In Schutzrüüm und Kasäärne, und denn git‘s no das Phagg,
das schlooft, bis es verhaftet wird, z‘Ziiri im Baur au Lac.


Bresidäntin wärde will y,
seit d Hillary zue iirem Billi.
Die alti Schachtle wett dä Job und voll Ibermuet,
frait si sich uff e Braggtikannt …. dä het si drum no z guet.


„Die achzig Chischte wei mer nit!
Do macht denn d SVP nit mit!
Nur wääge däre Uni do, wärdet zerscht konkreet.
Und überhaupt, was isch das gnau, en Uniwersideet?“

Peperoni


Dä Fischer do het scho Muet,
als Trainer isch är erscht no guet,
jä i zie vor im sogar dr Huet,
solang är numme mit dä Händ schwätze duet.


E Schneemaa uf-ere byygi Holz,
isch dä Ziircher ire ganze Stolz,
egal ob dr Summer scheen wird oder durzooge,
i mach sowiso um die Stadt e grosse Booge.


Dr heggschti Turm im ganze Land,
e huffe finde, es syg e Schand,
d Archideggte heert me verzelle,
me haig numme welle, Ziiri in Schatte stelle.

Pierrot